乘風而吃

上個星期乘着寒風, 一干人等到了九龍城食宵夜. 到了這間已三年不見的竹園, 如果你有看上期 “飲食男女”, 雜誌訪問的, 就是這間食店的分店了.

側傳的是, 尖沙咀分店跟九龍城老店早已反面, 一早兩哥兒已各有各做了. 今餐既是為芝士焗龍蝦伊麵而來, 其他的就當八卦吹下水算了.

之前上openrice見過不少食評, 盡踩龍蝦太細, 服務嘛嘛. 當然啦, 送啤酒橙汁只需 $ 4xx 埋單的二人餐, 又斑又鮑魚又芝士龍蝦麵, 心水稍清都是什麼龍蝦吧 ? 所以, 我們二人只是散叫了 芝士焗龍蝦伊麵 + 兩隻椒鹽賴尿蝦.

味道跟賣相, 芝士焗龍蝦伊麵是絕對無得頂的. 龍蝦是即叫即劏, 鮮味很爆. 芝士汁超濃, 絕對會令膽固醇超標. 賴尿蝦(掛住食, 無影到相)稍為失色, 因為個殼很難剝. 剝殼後, 椒鹽味又打了七折, 但勝在蝦味頗濃.


二人埋單合共 $ 600 大洋, 冇加一.

(因為揀了較大隻的龍蝦,
所以單是龍蝦麵已 $ 4xx 了)