Friday, April 15, 2011

謀事在人

我盡量嘗試維持每天都寫點東西上來,早兩星期卻甩甩漏漏的,三兩天才更新一次,原因是...去了學車跟考車.

有朋友會問,吓 ? 你吾係一早搞掂架咩 ???

我五年前考過兩次,一次斜路溜後,然後再死火,係斜坡撻着部車,然後竟然再二波上斜,再次死火。另一次,短路塞車用三波,大路暢通卻用二波龜速。好明顯,個兩次我都吾知自己做緊乜野。

今次吾同了,有朋友介紹了一個好的教車師傅,使了幾千蚊瘋狂補鐘,幾乎連續四星期每天都練習揸車。又再上網返喪睇考試路線,睇到比自己回家路線還要熟。自覺把可以做的都做了很多,要是這次也肥佬,可能真是天意難違,干脆去考直升機牌算了。

所謂: 成事在天,謀事在人。臨考前五天,為自己占卜了一次。啊,卦象的說法也不太妙, 雖未至於全盤皆墨。但四處問師兄弟,也是一致看淡。把曆法打開,尚有一局可佈,即擇日為自己在家裡佈下吉星陣。因時間不許可,否則分分鐘半夜跑到試場作法,祈求陰陽兩路,如土地公公或眾孤魂野鬼多多關照。

到了考試那天,一駕入了指定路線,過了第一盞紅綠燈,竟然有架仆街礦泉水車,在路口上落貨。這種情況因要爬頭,所以最易出事。我慢慢的停了車,盡量做足指定動作才爬頭。完成後我偷望了阿sir 的動作 - shit ! 他好像剔了兩格, 呢劑大檸鑊。之後心如死灰的完成整個考試路線,停車拉handbreak 便等成績表了。

在那大約五分鐘的等候過程裡,有點像見工面試般緊張,或像投考空軍轟炸部隊般大陣仗。當值阿sir 叫我拿通知時,我竟然見到表上剔了 “pass” , 差點以為自己眼花。這個pass, 猶如闖了幾輩子刀山油鑊,來得太過千山萬水。令我好像唸了九千萬次大悲咒,終於修成正果,再世輪迴化作引擎內的一枚舍利子,激動得大叫起來。

No comments: